شرشريات

صحيت في يوم من النوم

و في بالي حاجة واحدة

اني اكشف المجهول

اني اقضي على الوحدة

رحت انادي على نفسي

يمكن تسليني في العزلة

لاقيت نفسي بقول لي

تتونس بأية هو انا فاضية

طيب و العيش و العيشة و اللي عيشينها

دي حلقة مفرغة عمرنا ماهنعرف نعديها

قلتلها طيب خبيني معاكي فيها

قالتلي انت مش محتاج تيجي

انت اصلا كدة كدة فيها

و عجبي

ملحوظة: على فكرة الزجل دة دة لو كان زجل اصلا من تأليفي مع العلم بأني مادرستش قواعد الزجل دة فياريت لو حد هينقد حاجة ياريت يبقى بشويش و براحة على اخوكم

خطى على جسر مقطوع

السلام عليكم
ما تتفقوش معايا ان الحال كل شوية و هو في النازل
و ان العيشة بقت مرة و الناس ماعدتش زاي الأول, ساعات تسمع كلام غريب عن زمان و بركة زمان و اكل زمان و كلام عن السحتوت و والتعريفة ورطل اللحمة و النوم بعد العشا و الراجل اللي بيتجوز اتنين و تلاتة ( على فكرة ماحدش يفهمني غلط بس الأصل في الموضوع دة هو تعدد الزوجات) و سي عبد المطلب و الكلام اللي بتسمعه من جدك و جدي و الناس القديمة دي مع انهم زاي ما كانوا بيتكلموا عن الخير و البركة اتكلموا برضه على ان الدخل كان قليل و ان حصل فترات كساد و ركود كتيييييير جدا ايام الحرب العالمية الأولى و التانية مما يؤكد ان الشعور بالغلى دة عملية نسبية و ان الغلى و صعوبة المعيشة اللي حسين بيها دلوقتي زيها زاي زمان
بس في حاجة غلط
اكيد
بدليل ان اخلاق الناس اتغيرت, تعالى دلوقتي شوف في الاتوبيس مثلا لو واحدة ست عجوزة مش لاقيه كرسي تقعد عليه كل واحد فينا قاعد عمره مابيفكر يقوملها
كله يقول لك وانا مالي ماتولع بجاز
حد قالها تتنيل على عينها و تقوم تركب الاتوبيس
دلوقتي بقى الواحد عنده استعداد يموت اللي جنبه علشان رغيف عيش زاي ما انتم عارفين
دلوقتي عادت الحياة صعبة جدا
مع الاعتراف التام بإننا احسن من غيرنا و ان في اتصالات و موبايل و دش و sms و mms و 3g و الانترنت اللي مخليني اكتب في الورطة دي اللي اسمها مدونة
المشكلة انتو عارفين مش الحال اللي احنا فيه المشكلة في اننا رايحين على فين
كل شوية وعود و ان الحالة بكرة تروق و تحلى و ان العيشة هتبقى عال العال و ان المستقبل مشرق و التقدم التكنولوجي هيسود العالم بس احنا مش شايفين اي مقدمات لكدة

انا عاوز اي حد متفائل يقعد بس من الساعة 9 بليل ياخد جولة في برامج الفضائيات يبتديها بمعتز الدمرداش في 90 دقيقة وراها العاشرة مساءا على عمرو اديب الساعة 11 و نص كورس كامل من التعرف على حال المجتمع بدون اي زيف و لا نفاق حكومي معتاد
انا عاوزك بس تتفرج عليهم اسبوع و تقول لي اية الاخبار

بداية بلا انطلاق

السلام عليكم
بكتبلكم في المدونة لأول مرة و انا بجرب اشوف كدة نصيحة حسام صحبي اللي بيقول لي ان عالم المدونات دة عالم فظيع و هيشدك جامد , بيني و بينكم انا كنت عاوز اصلا اتفرج على ماتشات بطولة كاس الأمم الأوروبية بس ساعات الواحد بيحس اننا كرجالة بنضيع حياتنا كتير في الكورة اللي ماعدتش زاي الأول اللي بقت فلوس و اعلانات و ابو تريكة و فودافون و حسني راح و حسني جة و دة وقع و دة مضى

دي شغلانة و الله

خلينا في موضوعنا بقى و خليني اكتب الكلمتين قبل ما الماتش يبدأ !!!!!

المشكلة ان اليومين دول بقى الدنيا حر و لما نقول الحر في مصر يبقى بنقول العرق الرطوبة العربية السخنة لزقة الناس جنب بعض في الحر لغاية ما هيجيلك تينيا حتى الشقة نفسها بتلاقي حيطتها بليل تخزن السخونية طوووووووول اليوم و بعد كدة تبخ على جتتك جوة الشقة كمان خد عندك مروحة قاعدة تلف فوق دماغك لغاية ما يجيلك صداع و وجع في رقبتك يبقى ياإما حر و عرق أو صداع ووجع في جسمك كله

ناس كتيرة هتسألني ليه مسمي المدونة بتاعتي كدة

هقولكم : انا واحد من المصريين اللي تخرجوا من التعليم العالي و تحديدا من كلية التربية قسم لغة انجليزية و يحذوه امل في التعيين وكالعادة مافيش و اانتم تعرفوا يعني اية مافيش واضطرتني الظروف الى تحويل هوايتي منذ الصغر ( الكومبيوتر) إلى احتراف و وسيلة اكل العيش عندي بما ان مافيش تعيين و مافيش شغل

بقول لكم اية الماتش هيتشغل بقى بتاع المانيا و انا الناس دي بالذات بحب اتفرج عليهم

شوية و ارجعلكم تاني

سلام